डाक्टर अउर वकील: अवधी रचनाकार प्रमोद साधक

दुनव समझय पीर डाक्टर अउर वकील।
दुनव करय फकीर डाक्टर अउर वकील।

दुनव दुखियक कय नारी टोवय।
सुखान बिया बेमनकय बोवय।

उप्पर छिरकय नीर डाक्टर अउर वकील।
दुनव करय फकीर डाक्टर अउर वकील।

खुब तगड़ा से बेवहार बनावय।
कर्ज के बोझ से हमय दबावय।

दुनवक एक लकीर डाक्टर अउर वकील।
दुनव करय फकीर डाक्टर अउर वकील।

यक आला यक टाई लटकावय।
बस दुनव अपनेक बड़ा बतावय।

बोलय रक्खव धीर डाक्टर अउर वकील।
दुनव करय फकीर डाक्टर अउर वकील।

यक महिनम यक हप्तम् बलावय।
यक बयान हल्फी यक सुई लगावय।

दुनवक यकय तीर डाक्टर अउर वकील।
दुनव करय फकीर डाक्टर अउर वकील।

यक शरीर यक जमीन वरुवावय।
यक रिफर यक केस बढ़ावय।।

दुनवक एक जमीर डाक्टर अउर वकील।
दुनव करय फकीर डाक्टर अउर वकील।

साधक मर्ज मुकदमा यकय मेर।
यक शेर तव दुसरा बब्बर शेर।

दुनव डरिहय चीर डाक्टर अउर वकील।
दुनव करय फकीर डाक्टर अउर वकील।

अवधी रचनाकार
प्रमोद साधक
रमपुरवा बहराइच